Решенијата по приговори се објавени на 21.07.2020 година, во 18:18 часот

• Решенија по приговори од подносителот на листа ВМРО-ДПМНЕ и Коалицијата обнова на Македонија, УП1 10-163
• Решенија по приговори од подносителот на листа ВМРО-ДПМНЕ и Коалицијата обнова на Македонија, УП1 10-164

Решенијата по приговори се објавени на 21.07.2020 година, во 17:55 часот

• Решенија по приговори од подносителот на листа СДУ- Македонски концепт, УП1 10-82
• Решенија по приговори од подносителот на листа СДУ- Македонски концепт, УП1 10-86

Решенијата по приговори се објавени на 21.07.2020 година, во 13:10 часот

• Решенија по приговори од подносителот на листа МОРО – Работничка партија, УП1 10-85

Решенијата по приговори се објавени на 21.07.2020 година, во 11:00 часот

• Решенија по приговори од подносителот на листа ИНТЕГРА – Македонска конзервативна партија, УП1 10-87

На 79-та седница на Државната изборна комисија, која се одржа на 19 јули 2020 година, се одлучуваше по поднесените приговори во постапката за заштита на избирачкото право на подносителите на листите на кандидати во постапката за гласање, сумирање и утврдување на резултатите од гласањето.

Во определениот законски рок, согласно член 148 од Изборниот законик, до Државната изборна комисија беа поднесени приговори од повеќе подносители на листи и тоа Левица, Коалиција Алијанса за Албанците и алтернатива, СДУ, Единствена Македонија, МОРО – Работничка партија, Интегра – македонска конзервативна партија, Глас за Македонија и ВМРО-ДПМНЕ и Коалција „Обнова за Македонија“ и согласно член 69-а од Изборниот законик беа поднесени приговори од Коалиција „Можеме“ и ВМРО-ДПМНЕ и Коалција „Обнова за Македонија“.

По однос на приговорите кои беа доставени од страна на Левица, беа отфрлени вкупно 1478 приговори кои не ги исполнуваа условите од член 147 став (3) од Изборниот законик, бидејќи истите беа поднесени без потпис и печат.

Државната изборна комисија изврши детален увид и во останатите приговори и едногласно ги одби поради тоа што истите не беа поткрепени со факти и докази. Ниту еден од подносителите на приговорите во своите приговори немаше постапено согласно законската рамка и ја немаше искористено можноста која е дадена согласно Изборниот законик да се постапува во случај на евентуални нерегуларности во изборниот процес.

Во прилог на приговорите не беше доставен соодветен доказ за наводите кои беа наведени во нив, а во Записникот бр.16 и Записникот бр.21 за секое избирачко место кое е предмет на приговор, немаше забелешка од ниту еден член од избирачките одбори, ниту од овластените претставници од подносителите на листите (согласно член 116 став 3 од Изборниот законик), кое исто беше утврдено по повеќекратните проверки и увид во записниците од страна на Државната изборна комисија.

Исто така не беше постапено и согласно член 117 став (6)  каде  е наведено дека доколку забелешките на претставниците на подносителите на листите не се евидентирани во записникот, тие имаат право да ги достават до општинската изборна комисија во рок од 5 часа од составувањето на записникот и забелешките согласно одредбите од член 116 став 3 да бидат основа за приговор.

Државната изборна комисија ги констатираше бројките кои беа сумирани од страна на избирачките одбори и општинските изборни комисии, односно бројките се потврдени а мандатите поделени соодветно освоените гласови.

Државната изборна комисија се заблагодари на сите кои учествуваа во овој изборен процес, со што истакна дека изборната администрација беспрекорно ги спроведе овие избори и овозможи да се одвиваат во мирна атмосфера. Постапувајќи согласно Изборниот законик и подзаконските акти донесени од Државната изборна комисија, изборната администрација овозможи секој граѓанин да го оствари правото на глас и обезбеди спроведување на фер и демократски избори.

Резултати врз основа на податоци од записниците од избирачките одбори – Предвремени избори за пратеници во Собранието на Република Северна Македонија, 15 јули 2020 година

Државната изборна комисија, на 78-та седница одржана нa 16 јули 2020 година, информираше за состојбата после спроведеното гласање за Избор за пратеници во Собранието на Република Северна Македонија, 15 јули 2020 година, врз основа на податоците во доставените записници од општинските изборни комисии, избирачките одбори и целокупниот останат изборен материјал, со што од вкупниот број на избирачи запишани во Избирачкиот список кој изнесува 1.814.236, вкупниот број на избирачи кои гласале изнесува 942.334, вкупниот број на неупотребени гласачки ливчиња изнесува 869.889, вкупниот број на важечки гласачки ливчиња изнесува 910.868 и вкупниот број на неважечки гласачки ливчиња изнесува 31.466.

По однос на распределбата на мандатите за избор на пратеници во Собранието на Република Северна Македонија според бројот на вкупните гласови што ги добиле листите на кандидати, одделно врз основа на сумираните резултати од општинските изборни комисии за избирачките места во изборните единци за кои се надлежни, ДПА освоила еден мандат во ИЕ 6, Коалицијата „Можеме“ во ИЕ 1 освоила 8 мандати, во ИЕ 2 освоила 7 мандати, во ИЕ 3 освоила 9 мандати, во ИЕ 4 освоила 10 мандати, во ИЕ 5 освоила 8 мандати и во ИЕ 6 освоила 4 мандати, вкупно 46 мандати, Левица во ИЕ 1 освоила 1 мандат и во ИЕ 3 освоила 1 мандат, вкупно 2 мандати, Алијанса на Албанците и Алтернатива во ИЕ 1 освоила 2 мандати, во ИЕ 2 освоила 3 мандати, во ИЕ 5 освоила 1 мандат, во ИЕ 6 освоила 6 мандати, вкупно 12 мандати, ДУИ во ИЕ 1 освоила 2 мандати, во ИЕ 2 освоила 3 мандати, во ИЕ 5 освоила 3 мандати, во ИЕ 6 освоила 7 мандати, вкупно 15 мандати, и ВМРО – ДПМНЕ и Коалиција Обнова на Македонија, во ИЕ 1 освоила 7 мандати, во ИЕ 2 освоила 7 мандати, во ИЕ 3 освоила 10 мандати, во ИЕ 4 освоила 10 мандати, во ИЕ 5 освоила 8 мандати и во ИЕ 6 освоила 2 мандати, вкупно 44 мандати.

Истовремено, Државната изборна комисија информираше дека гласањето кое беше спроведено на 13 јули 2020 година, 14 јули 2020 година и 15 јули 2020 година, со оглед на условите во кои се спроведуваше поради состојбата со Коронавирусот се одвиваше непречено и согласно тоа упати честитки до сите учесници во изборниот процес и нивниот демократски капацитет кој овозможи фер и демократски избори.

Иако во текот на сумирањето на резултатите за гласањето Државната изборна комисија се соочи со голем предизвик и проблем поради хакерскиот напад врз софтверот за внес и пребројување на резултати, Комисијата истакна дека работи согласно Изборниот законик, а резултатите ги објавува по добиените записници број 16 и број 21 од општинските изборни комисии.

Конечниот резултат од спроведеното гласање за Предвремените избори за избор на пратеници во Собранието на Република Северна Македонија, 15 јули 2020 година ќе биде објавен од страна на Државната изборна комисија, по завршувањето на постапката со приговорите кои ќе се разгледуваат по две основи и тоа по однос на постапката за гласање, кој што рок почнува од завршувањето на гласањето, 15 јули 2020 година, 21 часот и ќе трае 48 часа и постапката за сумирање и утврдување на резултатите, кој рок почнува да тече од моментот на објавувањето на резултатите од страна на Државната изборна комисија и ќе трае исто така 48 часа. Државната изборна комисија и по двата вида на приговори треба да одлучува во рок од 72 часа од добивањето на приговорите.

Државната изборна комисија  Ве информира дека сеуште се врши прием на материјалот од општинските изборни комисии и при тоа рачно се проверуваат записниците за сумирање и утврдување на резултатите од избирачките места (записници бр.16) , како и записниците за сумирање и утврдување на резултатите од општините (записник бр. 21), со цел точно да можат да се утврдат неофицијалните конечни резултати.

Неофицијалните конечни резултати ќе бидат соопштени на попладневната седница на Државната изборна комисија, за која благовремено ќе Ве известуваме..

Државната изборна комисија појаснува дека гласачките ливчиња добиени од гласањето на граѓаните кои се позитивни на КОВИД-19 или се во самоизолација, а кои гласале на 13.07.2020 година, и гласачките ливчиња од гласањето на болните и немоќните лица, кои гласале на 14.07.2020 година, согласно одредбите на Изборниот законик и упатствата на Државната изборна комисија, не се отвораат и не се бројат пред денот на гласањето, туку истите, во пликови, се наоѓаат запечатени во гласачката кутија за соодветното избирачко место.

Истите, пред започнувањето на гласањето на самиот ден на гласањето, 15.07.2020 година, се вадат од гласачката кутија, едно по едно се вадат од пликовите и, без да се провери за кого е гласано, се ставаат во гласачката кутија за соодветното избирачко место. Истата потоа се користи за редовното гласање.

Напоменуваме дека на 13.07.2020 година и 14.07.2020 година не се објавуваат резултати од гласањето, туку само излезност, т.е. бројот на гласачи кои гласале.

Овие гласачки ливчиња, заедно со останатите ливчиња од гласањето на 15.07.2020 година, се пребројуваат по завршувањето на гласањето на 15.07.2020 година, по 21 часот.