Со Решение за распишување на Избори за претседател на Република Северна Македонија, број 09-1168/1 од 14.02.2024 година и Решение за распишување на Избори за пратеници во Собранието на Република Северна Македонија број 09-1169/1 од 14.02.2024 година, донесени од Претседателот на Собранието на Република Северна Македонија, се распишани Избори за Претседател на Република Северна Македонија кои ќе се одржат на 24 април 2024 година и Избори за пратеници во Собранието на Република Северна Македонија кои ќе се одржат на 8 мај 2024 година.

Имајќи во предвид дека со распишување на изборите, почнуваат да течат роковите за извршување на изборните дејствија согласно усвоените роковници од страна на Државна изборна комисија, Државната изборна комисија ги известува претседателите, членовите и нивните заменици на Општинските изборни комисии дека е потребно да започнат со преземање на сите изборни дејствија од нивна надлежност согласно Изборниот законик, подзаконските акти на ДИК, како и насоките од Државна изборна комисија почнувајќи од ден 26.02.2024 година (понеделник).

Со ова Известување се задолжуваат претседателите на Општинските изборни комисии да стапат во контакт со заменик претседателот, членовите и нивните заменици на Општинските изборни комисии. Во отсуство на претседател на Општинската изборна комисија, должноста за контактирање на членовите и нивните заменици ја презема заменик претседателот на ОИК. Во случај на отсуство на претседателот и заменик претседателот на ОИК, должноста за контактирање на останатите членови и нивни заменици ја презема еден од членовите.

За сите задолженија и дејствија за подготовка на изборите кои треба да ги преземете како Општинска изборна комисија навремено ќе бидете информирани од страна на назначените координатори на Општинските изборни комисии.

ДРЖАВНА ИЗБОРНА КОМИСИЈА

Собирањето на потписи започнува десетиот ден од денот на распишувањето на изборите и трае 15 дена.

Собирањето на потписи започнува на 23 февруари и трае до 08 март до 24:00 часот.

За време на собирањето на потписите Подрачните одделенија и канцеларии на Државна изборна комисија, ќе работат секој ден во наведениот период,  непрекинато во периодот од 08:00 часот до 20:00 часот и последниот ден, односно 08 март до 24:00 часот.

Иницијативата за собирање на потписи за подршка на поднесена листа на кандидат за Претседател на Републиката и за поднесена листа на кандидати за пратеници кога поднесената листа е од ,,група избирачи,, се поведува со поднесување на  Известување и Изјава (https://drive.google.com/file/d/1QpAHy23Hpuja0Ndt_gp3PWbrJk_LRwMY/view) до Државната изборна комисија, од страна на предложениот кандидат односно лице овластено од негова страна со генерално овластување заверено на нотар.

Генералното овластувањето што го дава кандидатот за кој се собираат потписи се однесува и за  поднесувањето на известувањето и изјавата до ДИК како и на доставувањето на соодветните обрасци до подрачните оделенија и канцеларии на Државната изборна комисија, увид во дадените потписи за листата на кандидат за која се овластени и подигнување на образецот со собраните потписи.

Овластеното лице од страна на подносителот на иницијативата, може да овласти друго лице  за секое подрачно одделение и канцеларија на Државната изборна комисја во негово име да ги изврши горе наведените активности со посебни овлстувања. Овластувањата е потребно да бидат заверени на нотар, оригиналот од овластувањето се доставува до подрачните одделенија и канцеларии на Државната изборна комисија, копијата ја задржува подносителот.

 Во известувањето се наведува дека ќе се собираат потписи за подршка  и се наведува во кои подрачни одделенија и канцеларии на Државна изборна комисија и нотари, потписите ќе се собираат.

Подрачни одделенија и канцеларии на Државна изборна комисија ( https://www.sec.mk/kontakti/ )

Подрачно одделение Гевгелија, надлежно за општина Гевгелија, Дојран и општина Богданци

Канцеларија Валандово надлежно за општина Валандово.

Подрачно одделение Кичево, надлежно за општина Кичево.

Канцеларија Македонски Брод надлежно за општина Македонски Брод и Пласница.

Подрачно одделение Кочани, надлежно за општина Кочани, Чешиново – Облешево и општина Зрновци

Канцеларија Виница надлежно за општина  Виница.

Подрачно одделение Берово, надлежно за општина Берово и Пехчево

Канцеларија Делчево  надлежно за општина  Делчево.и Македонска Каменица.

Подрачно одделение Охрид, надлежно за општина Охрид и Дебарца.

Подрачно одделение Струга, надлежно за општина Струга и Вевчани

Канцеларија Дебар  надлежно за општина  Дебар и Центар Жупа.

Подрачно одделение Струмица, надлежно за општина Струмица, Ново Село, Василево и Босилово.

Канцеларија Радовиш  надлежно за општина  Радовиш и Конче.

Подрачно одделение Велес, надлежно за општина Велес , Чашка и Градско.

Канцеларија Кавадарци  надлежно за општина  Кавадарци и Росоман.

Канцеларија Неготино  надлежно за општина  Неготино и Демир Капија.

Подрачно одделение Штип, надлежно за општина Штип  и Карбинци

Канцеларија Пробиштип  надлежно за општина  Пробиштип

Канцеларија Свети Николе  надлежно за општина  Свети Николе и Лозово.

Подрачно одделение Битола, надлежно за општина Битола, Новаци  и Могила.

Канцеларија Ресен  надлежно за општина  Ресен.

Канцеларија Демир Хисар  надлежно за општина  Демир Хисар.

Подрачно одделение Гостивар, надлежно за општина Гостивар, Врапчиште и Маврово и Ростуша.

Подрачно одделение Куманово, надлежно за општина Куманово, Липково и Старо Нагоричане.

Канцеларија Крива Паланка  надлежно за општина  Крива Паланка и Ранковце.

Канцеларија Кратово  надлежно за општина  Кратово.

Подрачно одделение Прилеп, надлежно за општина Прилеп, Долнени и Кривогаштани.

Канцеларија Крушево  надлежно за општина  Крушево.

Подрачно одделение Тетово, надлежно за општина Тетово, Теарце, Брвеница, Боговиње, Желино и Јегуновце.

Подрачно одделение Карпош, надлежно за општина Карпош, Ѓорче Петров и Сарај.

Подрачно одделение Центар, надлежно за општина Центар и Аеродром

Подрачно одделение Чаир, надлежно за општина Чаир, Бутел, Шуто Оризари и Чучер Сандево.

Подрачно одделение Гази Баба, надлежно за општина Гази Баба, Арачиново, Петровец и Илинден.

Подрачно одделение Кисела Вода, надлежно за општина Кисела Вода, Студеничани, Зелениково и Сопиште.

Потписите се собираат на обрасци кои се пропишани од страна на Државна изборна комисија и истите се објавени на интернет страната на Државна изборна комисија https://www.sec.mk/.  во  ,,УЧЕСНИЦИ ВО ИЗБОРИ,, во делот ,, ПРЕТСЕДАТЕЛСКИ ИЗБОРИ 2024,, односно ,,ПАРЛАМЕНТАРНИ ИЗБОРИ 2024,,

За собирање на потписи за предлагање на кандидат за Претседател на Република Северна Македонија предложен од ГРУПА ИЗБИРАЧИ – е oбразец број 1б 

Образец бр. 1b – За собирање на потписи за предлагање на кандидат за Претседател на РСМ предложен од група избирачи

За собирање на потписи за предлагање на кандидати за избор на пратеници во Собранието на Република Северна Македонија за листа на кандидати предложена од група избирачи е  Образец број 2 https://docs.google.com/document/d/1jQA0rlJd33CXfbkJ2e1fPdUX3S9EZmxS/edit

Секој подносител на листа на кандидати е должен сам да го изготви образецот.

ДРЖАВНА ИЗБОРНА КОМИСИЈА

Денеска,15 февруари 2024 година,Државната изборна комисија  оствари средба со Министерот за труд и социјална политика, Ѓоко Велковски.

Состанокот помина во конструктивна атмосфера и двете страни изразија подготвеност за соработка во насока на организирање и спроведување на фер и демократски избори.

ДРЖАВНА ИЗБОРНА КОМИСИЈА

Државната изборна комисија ги известува радиодифузерите, печатените медиуми и електронските медиуми (интернет портали), кои ќе обезбедуваат платено политичко рекламирање за учесниците во изборната кампања за Избори за Претседател на Република Северна Македонија во 2024 година, дека се должни да се регистрираат во Државната изборна комисија, во рок од 3 дена од денот на распишување на изборите.

Радиодифузерите, печатените медиуми и електронските медиуми (интернет портали) доставуваат „Барање за упис во регистар на радиодифузери, печатени медиуми и електронски медиуми (интернет портали) за Изборите за Претседател на Република Северна Македонија во 2024 година“ до Државната изборна комисија, задолжително со прилог тековна состојба издадена од Централен регистар на Република Северна Македонија, не постара од 30 дена.

Барањата за упис со прилог тековна состојба се поднесуваат електронски на следната електронска адреса: [email protected] или во архивата на ДИК на бул.„Св. Кирил и Методиј“ бр.54, 1000 Скопје (најдоцна до 24:00 часот на 17 февруари 2024 година).

Врз основа на поднесените барања за упис, Државната изборна комисија ќе изготви „Регистар на радиодифузери, печатени медиуми и електронски медиуми (интернет портали) за Изборите за Претседател на Република Северна Македонија во 2024 година“ кои ќе даваат услуги на платено политичко рекламирање за време на Изборите за Претседател на Република Северна Македонија во 2024 година. Регистарот со уредно поднесени и прифатени барања за упис во регистар на радиодифузери, печатени медиуми и електронски медиуми (интернет портали) за Избори за Претседател на Република Северна Македонија во 2024 година ќе биде јавно објавен на интернет страната на Комисијата.

Радиодифузерите, печатените медиуми и електронските медиуми (интернет порталите) се должни во рок од пет дена од денот на распишувањето на изборите да утврдат ценовници за платено политичко рекламирање на учесниците во изборниот процес (најдоцна на 19 февруари 2024 година до 24:00 часот).

Радиодифузерите и печатените медиуми се должни ценовниците за секој медиум одделно за платено политичко рекламирање да ги применуваат и за време на изборната кампања и притоа просечната цена (аритметичка средина) по секунда за едно деноноќие добиена според различните ценовно-рекламни временски периоди и тоа: Период 1 – од 00:00 до 08:00 часот, Период 2 – од 08:00 до 16:00 часот и Период 3 – од 16:00 до 24:00 часот кај радиодифузерите за платено политичко рекламирање, како и цената за закуп на рекламен простор во печатениот медиум да не ја надминува вкупната просечна цена на рекламирање на секој радиодифузер одделно пресметана во последните пет изминати изборни циклуси одржани на ниво на цела територија на државата и тоа за Изборите за членови на советите на општините и советот на градот Скопје и за градоначалници на општините и за градоначалник на градот Скопје во 2021 година, Предвремени избори за пратеници во Собранието на Република Северна Македонија во 2020 година, Изборите за Претседател на Република Северна Македонија во 2019 година, Локалните избори во 2017 година, Предвремените избори за пратеници во Собранието на Република Македонија во 2016 година, а за електронските медиуми (интернет порталите) цената за закуп на рекламен простор на интернет порталот за платено политичко рекламирање да не ја надминува просечната цена за рекламирање пресметана, за последните пет изминати изборни циклуси.

За Радиодифузерите, печатените медиуми и електронските медиуми (интернет порталите) кои не учествувале на сите изминати 5 изборни циклуси цената за платено политичко рекламирање не може да ја надминува просечната цена на рекламирање пресметана во последните пет изминати изборни циклус согласно Упатство за начинот и постапката за потврдување на просечно постигнатата цена за платено политичко рекламирање за радиодифузер, печатени медиуми и електронски портали (интернет портали) кои не учествувале на последните пет изборни циклуси донесено од страна на Државната изборна комисија со бр.08-441/1 од 14.02.2024 година.

Државната изборна комисија е должна да ги потврди и објави на нејзината веб страна доставените ценовници со просечно пресметаните цени утврдено од радиодифузерите и печатените медиуми, како и да ги објави ценовниците со цените утврдени од електронските медиуми (интернет порталите), согласно член 75-ѓ став (3) и (9) од ИЗ, во рок од 10 дена од истекот на рокот за доставување на ценовниците утврдени во ставот (3) на овој член.

Доколку Државната изборна комисија утврди неправилности во ценовниците од радиодифузерите и печатените медиуми го известува соодветниот медиум да изврши корекција на ценовникот во рок од 72 часа од приемот на известувањето.

Архивата на Државната изборна комисија ќе работи на прием на барања за упис во регистарот на радиодифузери, печатени медиуми и електронски медиуми (интернет портали) на ден 17.02.2024 година (сабота), до 24:00 часот.

Упатство за начинот и постапката за утврдување на просечно постигнатата цена и најниска цена за платено политичко рекламирање за радиодифузери, печатени медиуми и портали кои не учествувале во последните пет изборни циклуси

ДРЖАВНА ИЗБОРНА КОМИСИЈА

Денеска, 31 јануари 2024 година, Државната изборна комисија оствари средба со Министерот за внатрешни работи, Панче Тошковски.

Состанокот помина во конструктивна атмосфера и двете страни изразија подготвеност за продолжување на соработката во насока на организирање и спроведување на фер и демократски избори.

ДРЖАВНА ИЗБОРНА КОМИСИЈА

Во организација на Советот на Европа – Оддел за избори и партиципативна демократија, на крајот на месец ноември во Стразбур се одржа меѓународна конференција на тема „Улогата на центрите за обука за избори“ во подобрувањето на изборните процеси и изборите.

Во текот на Конференцијата, говорниците и учесниците, меѓу другото, ги споделија своите искуства и најдобри практики, разговараа за тоа како би можеле да бидат структурирани центрите за обука за избори, која е нивната улога, мисија и ресурси. Тие, исто така, разговараа и за важноста и влијанието на обуките врз изборната средина и културниот развој, како може да се спроведат политиките за обука, главните предизвици, глобалните трендови и технологии во изборниот процес, како и размена на главните перспективи за зајакнување на соработката на овие полиња меѓу земјите-членки на Советот на Европа.

Државната изборна комисија учествуваше на оваа Конференција преку своја претставничка. На панел сесија претставничката на ДИК го презентираше напредокот на Државната изборна комисија во последните две години, во насока на формирање на центар за обуки за избори. Преку презентацијата таа даде осврт на целокупниот процес, почнувајќи од реализацијата на студијата за изводливост, преку патоказот и акцискиот план, изготвувањето на сите потребни документи, па се до поднесувањето на предлог-измените на Изборниот законик, со кои се предвидува формирање на ваков центар.

Изборните органи играат клучна улога во обезбедувањето на правилно функционирање на демократските институции. Почитувањето на принципите на независност, интегритет, транспарентност и ефикасност е од клучно значење за нив, заедно со обезбедувањето професионална обука за членовите на изборната администрација и другите засегнати страни вклучени во изборниот процес. Ова беше истакнато и а време на четвртиот Самит на Советот на Европа, каде шефовите на држави ја нагласија потребата од враќање на довербата во изборните процеси и спроведување на избори според меѓународни стандарди.

ДРЖАВНА ИЗБОРНА КОМИСИЈА

Генералното собрание и пленарна конференција на Меѓународната женска асоцијација за изборна администрација (WEM-International) се одржаа во Прага, Чешка Република, на 8-9 ноември 2023 година.

Статутарниот собир, организиран од ИФЕС Украина со поддршка на Регионалната европска канцеларија на ИФЕС, собра истакнати претставници на изборните органи од 18 земји од целиот свет, меѓу кои и претставничка од Државната изборна комисија.

Учесниците разменија најдобри практики за интегрирање на родовите перспективи во работата на изборните органи, споделувајќи инспиративни искуства од женското лидерство во изборната администрација. На настанот и нови изборни органи се приклучија на членството во WEM-International, а беше избрано и Раководството на Извршниот комитет. Учесниците заеднички ја развија стратешката визија на здружението за следните две години.

Во текот на настанот беше организирана и работилница „Сојузници за еднаквост“ од страна на RENEWE – Regional European Network for Empowering Women in Elections.

Низ повеќе интерактивни сесии учесничките стекнуваа знаења и вештини околу справување со различни видови родово базирано насилство, и пружање поддршка на жртви на такво насилство, особено во онлајн просторот.

ДРЖАВНА ИЗБОРНА КОМИСИЈА

Во текот на септември и октомври 2023 година, Државната изборна комисија организираше и спроведе обуки за унапредување на родовата сензитивност на сертифицираните обучувачи на ДИК, насловени „Родовите аспекти на изборниот процес“.

На обуките се разработија темите родова еднаквост, родова пристрасност, стереотипи и предрасуди, родова еднаквост и избори, изборен процес и учество на жените, важноста на родово разделените податоци, рамка на изборни права и политика на Државната изборна комисија против сексуално вознемирување.

Обуките опфатија вкупно 106 учесници – 88 % од вкупниот број на сертифицирани обучувачи на Државната изборна комисија, од кои 52 мажи и 54 жени кои спроведуваат обуки на членовите на изборните органи на пониско ниво.

За да се обезбеди ефективна организација и ангажман, учесниците беа поделени во пет групи, од кои секоја се состоеше од приближно 20 до 25 лица. Сите овие групи беа внимателно избалансирани во однос на полот и географскиот регион, со цел да се промовира различноста и инклузивноста.

Темата за родова еднаквост и родовите аспекти на изборите беше воведена за прв пат оваа година како тема за обучувачите на Државната изборна комисија и имаше многу позитивно влијание. Таа беше оценета како многу корисна, со потреба да се повторува на одреден период, особено по изборите.

ДРЖАВНА ИЗБОРНА КОМИСИЈА

Денес, Претседателот на Државната изборна комисија, Александар Даштевски учествуваше на семинарот „ Набљудување на изборите и проценка на изборната админситрација кој се одржува во Виена, Австрија, во организација на ОДИХР.

Во своето обраќање на тема „ Успесите и предизвиците во предлагањето и спроведувањето на изборните реформи во Северена Македонија“, претседателот Даштевски се осврна на покрупните изборни реформи што ги има имплементирано ДИК во последните години. Тој го презентираше искуството со воведување на уредите за биометриска идентификација како и резултатите од спроведената реформа, реализацијата на обуките за избирачките одбори како и интегрирањето на родовите аспекти во работењето на ДИК. Исто така, Даштевски го презентираше и планот за формирање на Центар за обуки за избори кој што треба да почне да функционира до пролетта 2024 година.

Даштевски се осврна и на соработката со ОБСЕ и поддршката која ДИК ја добива од оваа организација  особено во напорите за спроведување на изборните реформи.  Тој потенцираше дека Државната изборна комисија континуирано ги следи препораките на ОБСЕ кои се однесуваат на изборните процеси, законската рамка и изборниот систем, изборната администрација, регистрација на гласачи, регистрација на кандидати, кампања и финансирање на кампања, медиуми, приговори и жалби, граѓански и меѓународни набљудувачи како и препораки за процесот на гласање на денот на изборите. „Исто така, со помош на ОБСЕ во 2021 година донесовме нов Деловник за работа на ДИК како и Правилник за работа на помошното тело кое ДИК го ангажира за време на избори што е особено значајно за унапредување на работата на институцијата и администрацијата. Се заблагодаруваме на ОБСЕ за досегашната соработка и очекуваме истата да продолжи уште поинтензивно и во наредниот период.“ – истакна претседателот Даштевски.

Обраќањето на Даштевски на семинарот во Виена беше во рамки на сесијата„ Улогата на телата кои управуваат со изборите и другите  телата кои управуваат со изборите и другите чинители во имплементација на клучните принципи за изборната администрација “.

ДРЖАВНА ИЗБОРНА КОМИСИЈА