Денес, претседателот на Државната изборна комисија, Александар Даштевски, учествуваше на панел дискусија за „Зајакнување на соработката помеѓу институциите за проценка на изборните ризици“, заедно со министри и одговорни лица на институции кои имаат надлежност во областа на изборните ризици.

Во своето излагање на панелот, Претседателот Даштевски истакна дека заштитата на интегритетот и правичноста на изборите е најважна за одржување на принципите на демократијата и дека Државната изборна комисија континуирано се залага за силна меѓуинституционална соработка, каде што различните засегнати страни работат рака под рака со цел справување со предизвиците и заштита на изборниот систем од ризици.

„Во соочувањето со предизвиците од областа на изборните ризици, Државната изборна комисија не може да работи изолирано. Од суштинско значење е заедничкиот пристап кој вклучува повеќе институции на различни нивоа на управување. Соработката поттикнува синергија, здружувајќи ја експертизата, ресурсите и перспективите за да се изградат сеопфатни стратегии кои најсоодветно ќе се справат со ризиците.“ истакна Претседателот Даштевски во своето обраќање на панел дискусијата.

Како клучни партнери во меѓуинституционалната соработка за проценка на изборните ризици, Даштевски ги посочи минстерствата кои што играат важна улога за да се обезбеди непречено спроведување на изборите, агенции за сајбер безбедност, граѓанските организации и медиумите.

На крајот од своето обраќање, претседателот на ДИК апелираше до сите присутни претставници од засегнатите институции и организации да ги негуваат партнерствата и дека само со неуморна работа може да се ублажат изборните ризици.

„Меѓуинституционалната соработка не е само прагматична неопходност, туку морален императив за заштита на интегритетот на нашите изборни процеси. Како претседател на Државната изборна комисија, би апелирал до сите вас да се заложиме да негуваме партнерства, да создаваме сојузи и да работиме неуморно со партнерските институции за да ги ублажиме изборните ризици и да ги поддржуваме демократските идеали врз кои е изградена нашата држава. Заедно, можеме да ја зајакнеме демократијата, осигурувајќи дека гласот на секој граѓанин се слуша и секој глас е важен.“ додаде Даштевски.

ДРЖАВНА ИЗБОРНА КОМИСИЈА

Денес,  претседателот на Државната изборна комисија, Александар Даштевски  се обрати на форумот „Граѓанските организации и изборите“ на кој учествуваа претставници на граѓанскиот сектор и претставници од државните институции. Покрај Претседателот Даштевски со поздравни обраќања форумот го отворија и заменичката на шефот на Мисијата на ОБСЕ во Скопје, Сузан Пенкса,   Џевахире Прути Зајази, претставник на  Швајцарска амбасада во Скопје и Иоана Козма, директорка на ИФЕС во Скопје.

На форумот се дискутираше за предизвиците и можностите за учество на граѓанските организации во изборниот процес, за пречките и решенијата за зголемено учество на недоволно застапените групи во изборниот процес како и за предизвиците и можностите за соработка меѓу граѓанските организации кои застапуваат различни таргет групи и меѓу граѓанските организации и релевантните институции вклучени во изборниот процес.

Претседателот Даштевски изрази благодарност до ОБСЕ мисијата во Скопје и ИФЕС, што ја идентификуваа потребата да се разговара на оваа тема бидејќи ова е добар начин да се споделат искуствата од поминати изборни циклуси и да се вкрстат сознанијата и практиките.

„Ние како институција, години наназад бележиме напредок во обезбедување на услови за непречено остварување на правото на глас на граѓаните од различни категории, лица со попреченост, млади гласачи, жени и различни возрасни категории, гласачи од различна националност, согласно законските надлежности и можности. За таа цел сакам да се заблагодарам и на организациите со кои досега сме имале соработка и заедно сме креирале пракса која од една страна била во согласност со потребите на граѓаните а од друга страна за нас значајно што сме овозможиле напредок во изборниот процес. “ истакна Претседателот Даштевски во своето обраќање на форумот.

На крајот од своето излагање, Даштевски апелираше за поголема вклученост на граѓанските организации во креирањето на политиките .

„Имајќи ја предвид нашата заложба за еднаков третман на сите граѓани како и нашата цел за спроведување на фер, слободни и  демократски избори, потенцирам дека сме отворени  за соработка со сите чинители во изборниот процес.“ рече Даштевски.

Државната изборна комисија беше ко организатор на Форумот „Граѓанските организации и изборите“  заедно со ОБСЕ Мисијата во Скопје и ИФЕС.

ДРЖАВНА ИЗБОРНА КОМИСИЈА

Државната изборна комисија ги известува овластените претставници на подносителите на Листи на кандидат за Претседател на Република Северна Македонија, дека ждрепката за утврдување на редоследот во единствената листа на кандидати ќе се одржи во понеделник, 25 март 2024 година со почеток во 12:00 часот.

Ждрепката ќе се одржи во седиштето на Државната изборна комисија, голема сала, 4 кат.

ДРЖАВНА ИЗБОРНА КОМИСИЈА

Државната изборна комисија (ДИК) се состана со Набљудувачката мисија на ОБСЕ/ОДИХР предводена од Амбасадорката Џилијан Стирк.

Средбата, одржана на 20 март во просториите на ДИК, обезбеди платформа за дискусија за различни аспекти на изборниот процес, вклучително и тековните подготовки за претстојните Претседателски и Парламентарни избори, како и скорешните измени и дополнувања на Изборниот законик. Двете страни разменија искуства и најдобри практики за дополнително зајакнување на интегритетот и кредибилитетот на изборниот процес.

За време на состанокот, ДИК ја потврди својата заложба за почитување на демократските принципи и го поздрави конструктивниот ангажман на Набљудувачката мисија на ОБСЕ/ОДИХР во следењето и оценувањето на изборните процеси. Соработката ја нагласува заедничката цел за промовирање на транспарентност, инклузивност и доверба на јавноста во изборната администрација.

„Задоволни сме што сме домаќини на оваа средба со Набљудувачката мисија на ОБСЕ/ОДИХР“, рече Александар Даштевски, претседател на Државната изборна комисија. „Вашата експертиза и непристрасно набљудување играат клучна улога во зајакнувањето на кредибилитетот и транспарентноста на нашите изборни процеси. Го цениме вашето партнерство и очекуваме континуирана соработка.“

Претставниците на НМ на ОБСЕ/ОДИХР ги поздравија напорите на ДИК за унапредување на изборниот процес и ја истакнаа важноста од одржлива соработка во зајакнувањето на демократското владеење.

И ДИК и НМ на ОБСЕ/ОДИХР изразија подготвеност да продолжат да работат заедно за унапредување на демократските вредности и практики.

ДРЖАВНА ИЗБОРНА КОМИСИЈА

Денес, Државната изборна комисија ја одржа 88 – та седница на која ги разгледа и едногласно ги потврди кандидатските листи за Избор на Претседател на Република Северна Македонија 2024 година. Комисијата заклучи дека кандидатските листи на Стево Пендаровски, Стевчо Јакимовски, Максим Димитриевски, Арбен Таравари, Билјана Ванковска Цветковска, Бујар Османи и Гордана Сиљановска Давкова се навремено доставени и даде рок од 48 часа за кандидатите Стефчо Јакимовски и Арбен Таравари да достават трансакциска сметка и единствен даночен број.

Државната изборна комисија на седницата едногласно го усвои Упатство за изгледот на беџовите за идентификација на изборните органи, изборната администрација, овластените претставници на подносителите на листа на кандидат, меѓународните и домашните набљудувачи за Изборите за претседател на Република Северна Македонија и Изборите за пратеници во Собранието на Република Северна Македонија, 2024 година.

На дневен ред на денешната седница на Државната изборна комисија беа разгледани барањата за акредитација на набљудувачи за претстојните избори во државата,  доставени од ОБСЕ/ОДИХР. Комисијата едногласно ги прифати сите 34 барања од ОБСЕ/ОДИХР и согласно тоа, на набљудувачите ќе им достави соодветни овластувања и беџови со кои ќе се идентификуваат за време на изборниот процес.

ДРЖАВНА ИЗБОРНА КОМИСИЈА

Државната изборна комисија информира дека заклучно со 14.03.2024, во подрачните одделенија и канцеларии на Државната изборна комисија, увид на своите податоци во избирачкиот список направиле 4859 лица. 7 лица поднеле барање за промена на своите податоци, 19 лица поднеле барање за запишување на своите податоци и 5 лица поднеле барање за бришење на податоци во Избирачкиот список.

Преку електронски пат заклучно со 14.03.2024, се провериле вкупно 22122 граѓани. Поднесени се 25 барања за промена на податоци, 6 барања за бришење на податоци и 10 барања за запишување на податоци во Избирачкиот список.

По однос на пристигнати барања за регистрација на гласачи во дијаспората, ве информираме дека досега се пристигнати вкупно 1451 пријави од кои 1101 се прифатени, 159 се одбиени и 191 необработени пријави. Напоменуваме дека овие податоци се јавно достапни на веб страната www.dijaspora.sec.mk.

Потсетуваме дека јавниот увид во Избирачкиот список како и промена , запишување и бришење на податоци од страна на граѓаните ќе може да се направи најдоцна до 18 март 2024 година, 24 часот.

Апелираме, граѓаните да се проверат во избирачкиот список односно доколку е потребно да побараат промена, запишување или бришење на своите податоци од Избирачкиот список за претстојните претседателски и парламентарни избори да го сторат тоа до дадениот рок.

ДРЖАВНА ИЗБОРНА КОМИСИЈА

Денес, до Државната Изборна комисија е доставена Иницијатива за собирање на потписи за кандидатура за Претседател на Република Северна Македонија, од страна на Гоце Ристов.

Потписите ќе се собираат во подрачните одделенија/канцеларии на Државната изборна комисија на цела територија на државата.

ДРЖАВНА ИЗБОРНА КОМИСИЈА

Денес, до Државната Изборна комисија е доставена Иницијатива за собирање на потписи за кандидатура за Претседател на Република Северна Македонија, од страна на Стево Пендаровски.

Потписите ќе се собираат во подрачните одделенија/канцеларии на Државната изборна комисија на цела територија на државата.

ДРЖАВНА ИЗБОРНА КОМИСИЈА